انا حسن بهنسي بهلول: دور عليا مش هتلاقيني
كتب :أحمد زاده
دور عليا مش هتلاقيني بسهولة إلا لو دورت بجد في عيون الناس بردو مش هتلاقيني أقولك ليه ؟ أنا يا سيدي من كتر الهموم نسيت أزعل، مش هقولك نسيت أفرح بس أنا مش عارف يعني إيه الفرح أصلاً أو متشرفتش بيه قبل كده يمكن سمعت عنه وكان نفسي يشرفني ويبقي صاحب ولادي.
أنا عرفته متأخر بطريقة غير مباشره بس معرفتي بيه سطحية أنا كل المحتاجه منه إنه يبقي أنيس لولادي أنا ممكن أصاحب الحزن عادي وأستحمل رخامته وتقله والدبش البيرميه عشان الفرح يبقى مع ولادي دايما. أنا بستحمل الذل والإهانه عادي في الشغل يومياً عشانهم، بستحمل تكبر فهمي بيه لما يبعت سواقه يخلص مصلحة عندنا عشان الكام ملطوش بتوع أخر شهر وياريتني بخدهم دول بعد الضرايب و التأمينات واللاذي منه مش بيجيبوا ربع كيلو طرب، صحابي بيهونوا عليا بس بردو بييجي يأنسنا اخونا الحزن وهمنا راكبنا كلنا، عماد بيضحك رغم مرض بنته ومداري الحزن جواه بس الحزن عنده قدره رهيبه و راشق لينا دايما اما الفرح مستكبر يعد معانا هو مش فاضيلنا اصلا!
رامز بيسمعنا رغم مرض والدته وحق الأدويه ال بيستلف عليهم بالفايض عشان يصرفهم من الصيدليه و برغم كل ده احنا عايشين بفضل ربنا ما سبحانه و تعالي رحمته كبيره و أكيد صاحبنا الفرح مش هيتكبر علينا يوم الموقف العظيم و هيتعظ و يكون جليسنا للأبد.
وقت الثوره أفتكرت انه هيأنسنا بس ولاد الحرام بلعوه و وقف في ذورهم دلوقتي عشان كانوا بيلعبوا بينا و بمشاعرنا، قالو عيش حريه و عداله اجتماعيه و اتاريها كانت أقوال لا أفعال، العيش اهو سعره بقي غالي والعداله الإجتماعيه كان حلم وأتبخر وفهمي بيه رجع أكتر جبروت من الأول و الحريه مش من مطالبي أصلا انا عايز أربي ولادي يا بيه، عايز حظهم يبقي أحسن مني، عايز أطمن علي بكره بتاعهم من غير قلق، ليه يروحوا مدرسه حكومه وينجحوا بالدروس الخصوصيه ال أنا مش معايا حقها؟ ليه أبني لما يكبر أكسفه و معرفش أجوزه ال بيحبها عشان معيش حق المهر و الكلام الفاضي ده، ليه بنتي اخاف عليها تنزل لوحدها عشان أزمة التحرش و أختفاء النخوه احنا فين يا ناس؟
زمان كان فيه بركه كان فيه نخوه و رجوله و شغل وخير وكان صاحبنا الفرح متواضع دلوقتي انا بدور علي الستر و بحمد ربنا عليه.
انا مش شغلي يطلعلي شعارات نسائيه وهي قويه بطبعها و ضد المجتمع كل ده بلح وفنكوش أنا عايز أربي عيالي وأسترهم يأما يمنعوا الخلفه و يريحونا بلا وجع دماغ!
ها عرفتوني ؟ انا حسن بهنسي بهلول أنا الغلبان فى هذا الزمان أنا الذى لو جاع نام .. أنا المسكين فى هذا الزمان .. أنا المحاط بالأوهام .. .. أنا المخدوع بالكلام ..
أنا اتسرقت يا على .. اتســــــــــــــــــرقت ! ! سرقوا كل حاجه حتي اسمي سرقوه ما أنا مسميش حسن ده الزعيم عادل أمام كان بيحكي قصتي في اللعب مع الكبار انا مليش أسم بس عارف ليا ايه؟
ليا رب كريم هيجيب حقي و لو مش بكره هيكأفني يوم القيامه عشان صبري و أيماني.
وَلَنَبْلُوَنَّكُمْ بِشَيْءٍ مِنَ الْخَوْفِ وَالْجُوعِ وَنَقْصٍ مِنَ الْأَمْوَالِ وَالْأَنْفُسِ وَالثَّمَرَاتِ وَبَشِّرِ الصَّابِرِينَ صدق الله العظيم. دورا عليا يا ناس لو لقتوني. قلولي لو مش موجود خلي بالكوا من ولادي و السلام أمانه لبتوع حقوق الأنسان .
